વ્યારા થી માંડવી તરફ જતા હાઇવે રોડ પર ચીખલવાવ ગામના હેલીપેડ નજીક બે ફોર વ્હીલર ગાડીઓ વચ્ચે સર્જાયેલા અકસ્માતમાં એક જ પરિવારના ચાર સભ્યોને નાની-મોટી ઇજાઓ પહોંચી હોવાની ઘટના સામે આવી છે.
પોલીસ સૂત્રો પાસેથી મળતી વિગત મુજબ, સુરત જિલ્લાના વહેવલ ગામે રહેતા દિનેશભાઈ ગુલાબભાઈ પટેલ પોતાના પરિવાર સાથે સ્વીફ્ટ કાર નંબર જીજે/૨૧/એએચ/ ૯૨૬૧ લઈને ઉંચામાળા ગામે લગ્ન પ્રસંગમાં જઈ રહ્યા હતા. તે દરમિયાન ચીખલવાવ ગામ નજીક સામેથી પૂરઝડપે અને રોંગ સાઇડે આવતી એક કિઆ કાર નંબર જીજે/૨૨/એચ/૬૬૯૦ ના ચાલક ચીમનભાઈ મણીલાલ ગામીતે (રહે. ચીમકુવા, સોનગઢ) તેમની કારને જોરદાર ટક્કર મારી હતી.આ અકસ્માતમાં સ્વીફ્ટ કારમાં સવાર દિનેશભાઈ પટેલને છાતી અને ખભાના ભાગે ફ્રેક્ચર થયું હતું. જ્યારે તેમની બહેન વિનતાબેનને ગાલ અને કમરના ભાગે ગંભીર ઇજાઓ, આસ્થાબેનને હાથ-પગમાં ફ્રેક્ચર અને પત્ની જયાબેનને શરીરે નાની-મોટી ઇજાઓ પહોંચી હતી. તમામ ઇજાગ્રસ્તોને તાત્કાલિક સારવાર અર્થે બારડોલીની સરદાર સ્મારક હોસ્પિટલ ખસેડવામાં આવ્યા હતા. કાકરાપાર પોલીસે કિઆ કારના ચાલક વિરૂદ્ધ કાયદેસરની કાર્યવાહી હાથ ધરી છે.
Users Today : 0
Users Last 30 days : 328
Total Users : 14297